Masharti na Kanuni za Mfumo

Utangulizi wa Masharti

Mfumo wa Umoja wa Shida na Raha umejengwa juu ya misingi ya uwajibikaji, uaminifu, nidhamu ya fedha na mshikamano wa kijamii. Ili kuhakikisha mfumo unaendelea kwa usalama na ufanisi kwa kila mshiriki, masharti na kanuni hizi zinaelekeza namna ya ushiriki, matumizi ya mfumo, uwazi wa taarifa na mwenendo wa wanachama wote.

Kila mshiriki anapaswa kusoma na kuelewa masharti kabla ya kujiunga. Mfumo unategemea nidhamu ya pamoja na uaminifu ndio msingi mkuu wa mfumo wetu.

Sheria za "Sisi kwa Sisi Tuinuane"

Mpango wa Sisi kwa Sisi Tuinuane ni mpango wa hiari wa kijamii wa mzunguko wa michango ya kila siku (upatu wa kidijitali) unaoendeshwa kupitia magroup ya WhatsApp na Msimamizi Mkuu. Si mkopo, si uwekezaji, na hauna dhamana ya faida (kifungu cha 10.1 cha Katiba).

• Kulipa mchango kabla ya saa 2:00 usiku kila siku
• Kufuata ratiba za mzunguko (siku 100, nafasi 100)
• Kuthibitisha miamala kwa Msimamizi kwa wakati
• Kuwa active kwenye group lake la WhatsApp
• Ulaghai na kughushi taarifa ni marufuku kabisa
• Kutowajibika kwa makusudi hautavumiliwa
• Kuvuruga group au kudanganya washiriki wengine ni kosa kubwa

Uhai wa mfumo unategemea nidhamu ya kila mshiriki mmoja mmoja.

Viwango vya Michango na Faini

Kila kundi lina nafasi 100 na hudumu kwa siku 100. Kila siku mshiriki mmoja hupokea mchango wa siku hiyo baada ya kukusanywa, siku hiyo hiyo (kifungu cha 10.5 cha Katiba).

Makato ni gharama za uendeshaji wa Mpango na hayarudishwi (kifungu cha 4.3 cha Sheria na Kanuni).

Wajibu wa Mwanachama wa Umoja wa Shida na Raha

Mshiriki wa Sisi kwa Sisi anaweza kushiriki katika mzunguko wa kifedha bila kuwa mwanachama rasmi wa Umoja. Hata hivyo, Mwanachama wa Umoja anatakiwa kuwa mfano wa nidhamu, uwajibikaji na ushirikiano ndani ya mfumo.

• Kulinda taswira ya mfumo kila wakati
• Kushiriki maendeleo ya kijamii na kuwasaidia wanachama wengine
• Kufuata Katiba ya Umoja wa Shida na Raha na kanuni zake
• Kutoa taarifa sahihi wakati wote
• Kuwa mfano mwema kwa washiriki wengine

Usalama wa Taarifa na Faragha

Mfumo unazingatia usalama wa taarifa binafsi na matumizi rasmi ya taarifa za wanachama. Taarifa za washiriki hazitolewi kiholela; mfumo hutumia taarifa kwa usimamizi rasmi wa wanachama pekee. Taarifa huhifadhiwa kwa usalama mkubwa na teknolojia ya usimbaji.

Umoja utalinda taarifa hizo kwa mujibu wa Sheria ya Ulinzi wa Taarifa Binafsi ya mwaka 2022, na wanachama wana haki ya kuomba kuziona na kuzisahihisha (kifungu cha 12.3 cha Katiba).

Umoja wa Shida na Raha inathamini faragha, usalama na ulinzi wa taarifa za washiriki wake.

Ukusanyaji wa Taarifa (KYC)

KYC (Know Your Customer) ni sehemu muhimu ya kuthibitisha usalama na uhalali wa washiriki ndani ya mfumo. Taarifa zinazoweza kuhitajika ni pamoja na:

• Majina kamili kama yalivyo kwenye NIDA
• Namba ya NIDA
• Namba ya simu inayotumika
• Mkoa na eneo la makazi
• Taarifa za malipo
• Next of Kin (mtu wa karibu wa kuwasiliana naye)

Sababu za KYC: Kuzuia udanganyifu, kujenga uwazi, kutambua washiriki rasmi na kulinda mfumo kwa ujumla (kifungu cha 2.4 cha Katiba).

Nidhamu na Uvunjaji wa Sheria

Mfumo una haki ya kuchukua hatua za kinidhamu dhidi ya washiriki wanaokiuka kanuni zilizowekwa. Hatua hizi zinaweza kujumuisha:

• Kutoa onyo rasmi la maandishi
• Kusimamisha ushiriki kwa muda
• Kuondoa mshiriki kabisa
• Kuchukua hatua za kiutawala (Serikali ya Mtaa, Mahakama)

Sababu za kuchukuliwa hatua ni pamoja na: kudanganya, kutotoa michango kwa makusudi, kuvuruga mfumo, kutishia washiriki, na kuvunja sheria za mfumo. Hatua hizi hulenga kulinda usalama na uadilifu wa mfumo kwa wanachama wote.

Uwazi wa Miamala

Mfumo wa Umoja wa Shida na Raha unahimiza uwazi wa miamala ili kila mshiriki aweze kufuatilia mwenendo wa shughuli kwa urahisi. Hii inajumuisha uthibitisho wa miamala, ratiba wazi za zamu, Mkea (ripoti ya michango na zamu inayotolewa kwenye group), rekodi za mizunguko na mawasiliano ya wazi kati ya washiriki wote.